माजी राष्ट्रपती प्रणव मुखर्जी यांचे निधन

  • रुग्णालयात उपचारादरम्यान घेतला अखेरचा श्वास

वृत्तसंस्था

नवी दिल्ली : माजी राष्ट्रपती प्रणव मुखर्जी यांचं निधन झाले. ८४ वर्षीय प्रणव मुखर्जी यांच्यावर गेल्या काही दिवसांपासून आर्मी रुग्णालयात उपचार सुरू होते. उपचारादरम्यान त्यांची प्रकृती खालावली होती. सोमवारी सकाळी रुग्णालयाने मेडिकल बुलेटिन प्रसिद्ध करत फुफ्फुसांच्या संसर्गामुळे ते सेप्टिक शॉकमध्ये गेले असल्याची माहिती दिली होती. त्यांना व्हेंटिलेटरवर ठेवण्यात आले होते. पण अखेर उपचारादरम्यान त्यांनी अखेरचा श्वास घेतला. प्रणव मुखर्जी यांचे पुत्र अभिजीत मुखर्जी यांनी ट्विट करत ही माहिती दिली आहे.

अभिजीत मुखर्जी यांनी ट्विटमध्ये म्हटलं आहे की, “जड अंतकरणाने मी आपणास सांगू इच्छितो की डॉक्टरांकडून अथक प्रयत्न, देशभरातून  प्रार्थना होत असूनही माझे वडील प्रणव मुखर्जी यांचं निधन झालं आहे”.

१० ऑगस्टपासून प्रणव मुखर्जी यांची प्रकृती बिघडली होती. १० ऑगस्ट रोजी त्यांच्या मेंदूत असलेल्या गाठीवर शस्त्रक्रिया करण्यात आली होती. दरम्यान एक दिवस आधी त्यांची करोना चाचणी पॉझिटिव्ह आली होती. रुग्णालयात दाखल झाल्यापासून त्यांच्या प्रकृतीत सुधारणा झाली नव्हती. त्यानंतर ते कोमात गेले आहेत असल्याचं रुग्णालयाकडून सांगण्यात आलं होतं.

प्रणव मुखर्जी हे भारताचे १३ वे राष्ट्रपती होते. राष्ट्रीय राजकारणात ते १९६९ पासून सक्रिय होते. भारतीय राजकारणातील अमूल्य सेवेसाठी त्यांना २००८ मध्ये पद्मविभूषण पुरस्काराने सन्मानित करण्यात आलं होतं. तर ८ ऑगस्ट २०१९ रोजी त्यांना राष्ट्रपती रामनाथ कोविंद यांच्या हस्ते भारतरत्न पुरस्कार प्रदान करण्यात आला होता.

 

भारताच्या दिवंगत पंतप्रधान इंदिरा गांधी यांच्या कार्यकाळात प्रणव मुखर्जी हे राजकारणात सक्रिय झाले होते. १९७३ मध्ये ते केंद्रीय मंत्रिमंडळात होते. १९८२ ते ८४ या काळात त्यांनी देशाचं अर्थमंत्रीपद भूषवले. १९८० ते १९८५ या कालावधीत राज्यसभेत ते लीडर ऑफ हाऊसही होते.

 

इंदिरा गांधी यांच्या मृत्यूनंतर राजीव गांधी देशाचे पंतप्रधान झाले. त्यावेळी थेट राजीव गांधींच्या नेतृत्वालाच आव्हान दिल्याने काही राजकीय कारणांमुळे त्यांना थोडंसे बाजूला करण्यात आलं. त्यामुळे त्यावेळी राष्ट्रीय समाजवादी काँग्रेस हा पक्षही त्यांनी स्थापन केला होता. मात्र १९८९ नंतर त्यांनी हा पक्ष काँग्रेसमध्ये विलीन केला.

 

१९९१ मध्ये राजीव गांधी यांची हत्या झाली. त्यानंतर पंतप्रधान पी. व्ही. नरसिंह राव यांनी त्यांचे राजकीय पुनर्वसन केले. त्यांची नियोजन आयोगाच्या उपाध्यक्षपदी निवड केली. काही महिन्यांनी नरसिंहराव यांनी मंत्रिमंडळात प्रणव मुखर्जींना परराष्ट्र मंत्री केले. २००४ मध्ये जेव्हा यूपीएचं सरकार आले तेव्हा पंतप्रधान होण्याची संधी त्यांना देण्यात आली नाही. मात्र डॉ. मनमोहन सिंग यांच्या मंत्रिमंडळात ते होते. २०१२ ते २०१७ या काळात ते भारताचे राष्ट्रपती होते.

    Leave Your Comment

    Your email address will not be published.*