अयोध्येत राममंदिराच्या कामाला सुरूवात; देणग्यांसाठी भाविकांना ट्रस्टचे आवाहन

वृत्तसंस्था

अयोध्या : श्रीराम जन्मभूमीच्या मंदिराचे बांधकाम सुरू झाले आहे. बुधवारी श्री रामजन्मभूमी तीर्थ ट्रस्टने याबाबत माहिती दिली. ५ ऑगस्ट रोजी पंतप्रधान नरेंद्र मोदी यांनी अयोध्येत भूमिपूजन केल्यानंतर आता प्रत्यक्षात बांधकामाला सुरुवात झाली आहे. राममंदिर ट्रस्टने बँक खाते क्रमांक आणि अन्य माहिती शेअर करून मंदिरासाठी दान करण्याचो आवाहन केले आहे.

रामजन्मभूमी तीर्थ क्षेत्र ट्रस्टचे सरचिटणीस चंपत राय यांनी बुधवारी एक व्हिडिओ प्रसिद्ध केला. ते म्हणाले की 5 ऑगस्ट रोजी पंतप्रधान नरेंद्र मोदींनी राम मंदिराचे भूमिपूजन केले. आता मंदिराचे बांधकाम सुरू झाले आहे. कोट्यावधी रामभक्तांना मंदिर बांधण्यात हातभार लावायचा आहे. यासाठी देणगी देण्यासाठी माहिती दिली जात आहे.

श्री रामजन्मभूमी तीर्थ ट्रस्टच्या वतीने ट्विटमध्ये म्हटले की, ‘जय श्री राम! भगवान श्री राम यांच्या पवित्र जन्मस्थळावर त्यांचे भव्य आणि दिव्य मंदिर बांधण्याचे काम माननीय पंतप्रधानांकडून भूमिपूजनानंतर सुरू केले आहे. श्री रामजन्मभूमी तीर्थ क्षेत्र मंदिरातील बांधकामासाठी सर्व श्री राम भक्तांना जास्तीत जास्त शक्ती आणि शक्य तितक्या देणगी देण्यासाठी आवाहन करतो.

विशेष म्हणजे सर्वोच्च न्यायालयाच्या निर्णयानंतर, केंद्र सरकारकडून हा ट्रस्ट तयार करण्यात आला. राम मंदिराशी संबंधित कामकाजाचा या ट्रस्टला अधिकार असेल. पंतप्रधान नरेंद्र मोदी यांना ट्रस्टने भूमिपूजनासाठी आमंत्रण पाठवले होते, त्यानंतर पंतप्रधानांनी ५ ऑगस्ट रोजी भूमिपूजन केले.

पंतप्रधान नरेंद्र मोदी यांच्याशिवाय राष्ट्रीय स्वयंसेवक संघाचे प्रमुख मोहन भागवत, उत्तर प्रदेशचे मुख्यमंत्री योगी आदित्यनाथ, राज्यपाल आणि अन्य संत राम मंदिर भूमीपूजनाला उपस्थित होते. मोदी म्हणाले होते की, ‘राम मंदिर देशात एकतेचा नवा धागा बनेल आणि इतिहास निर्माण होईल.’

    Leave Your Comment

    Your email address will not be published.*